Ավարտվեց «Դասընթաց դասընթացավարների համար» ծրագիրը
Բանիմաց դասընթացավարների մեր հերթական խումբը ավարտեց «Դասընթաց դասընթացավարների համար» ծրագիրը:
Դասընթացի նպատակն էր զարգացնել դասընթացավարների կարողությունները, ծանոթացնել կրթական նոր գործիքների ու մեթոդների՝ առավելագույնի հասցնելու վերջիններիս կողմից գիտելիքների և հմտությունների փոխանցման մակարդակը իրենց դասընթացների մասնակիցներին:
Մասնակիցները ունեցան և՛ խմբային, և՛ անհատական աշխատանքներ, մշակեցին իրենց դասընթացների թեմաներին համահունչ գործիքներ:
Դասընթացավարների վերապատրաստման ծրագիրը ընդհանուր առմամբ ներառում էր հետևյալը՝
- Ուսուցման հմտությունների բարելավում - դասընթացավարների կարողությունների զարգացում՝ մեծահասակների ուսուցման սկզբունքների, ուսուցման տեխնիկայի և վերապատրաստման մեթոդոլոգիաների կիրառմամբ:
- Առարկայական օրակարգի ձևավորում - ճշգրիտ և արդիական տեղեկատվության փոխանցում, օպտիմալ մեթոդների կիրառում՝ դերային խաղեր, իրավիճակային վերլուծություններ, լսարանի ներգրավածությունը բարձրացնող կամ հոգնածությունը մեղմացնող վարժություններ:
- Հաղորդակցման հմտությունների զարգացում - դասընթացավար լինելու կարևոր կողմ է արդյունավետ հաղորդակցումը և նյութի հեշտ մատուցումը՝ ներառյալ ակտիվ լսելը, հարցադրման տեխնիկան և կառուցողական արձագանք տալը, խմբի և դժվարին մասնակիցների կառավարումը, դրական և ներառական ուսումնական միջավայի ապահովումը:
- Դասընթացի արդյունքների գնահատում - դասընթացավարները պետք է կարողանան գնահատել իրենց դասընթացների ազդեցությունն ու արդյունավետությունը:
- Շարունակական զարգացման խթանում - դասընթացավարների վերապատրաստման նպատակը ոչ միայն նախնական հմտություններ և գիտելիքներ տրամադրելն է, այլև շարունակական ուսուցման և զարգացման մտածելակերպի ձևավորումը:
Դասընթացը վարեցին Արեգ Թադևոսյանը և Զարուհի Լավչյանը: Արեգ Թադևոսյանը և Զարուհի Լավչյանը վերջին քսան տարիների ընթացքում զբաղվել են կրթական ծրագրերով, դրանց որակի ապահովման, դասընթացավարների պատրաստման և վերապատրաստման ծրագրերով, մեթոդական ունակությունների զարգացման ծրագրերով՝ ուսուցիչների, ուսուցանողների, դասընթացավարների համար: Աշխատել են պետական, հասարակական և մասնավոր սեկտորիների կրթական ծրագրերում: Նրանք մեթոդական ձեռնարկների, ուսուցողական գործիքների, մեթոդների հեղինակներ են: Որպես մենթորներ և քոուչեր աշխատում են կրթական ոլորտի տարբեր դերակատարների հետ՝ օգնելով բարձրացնել կրթական ծրագրերի արդյունավետությունն ու որակը, հարստացնելով դրանք ժամանակակաից, ոչ ֆորմալ, ինտերակտիվ մեթոդական լուծումներով: Արեգը և Զարուհին որպես փորձագետներ և խորհրդատուներ աշխատել և աշխատում են Հայաստանում և արտասահմանում, պետական և ոչ պետական կառույցների, մի շարք միջազգային կազմակերպությունների և ծրագրերի հետ, որոնց թվում են Եվրամիության, Եվրախորհրդի, ՄԱԿ-ի տարբեր գործակալությունների կրթական ծրագրերը:
