Աշխատանքի տոնավաճառ Հայաստանում ֆրանսիական համալսարանում
Հարկային բարեփոխումների իրականացման հանրային ռազմավարության շրջանակներում հոկտեմբերի 9-ին ՀՀ ՊԵԿ Ուսումնական կենտրոնը մասնակցեց Հայաստանում ֆրանսիական համալսարանում կազմակերպվող ամենամյա աշխատանքի տոնավաճառին:
Աշխատանքի տոնավաճառին մասնակցում էին և՛ պետական, և՛ մասնավոր հատվածի կազմակերպություններ, մասնավորապես ՀՀ Արդարադատության նախարարության հարկադիր կատարումն ապահովող ծառայությունը, Բարձրագույն դատական խորհուրդը, խորհրդատվական, տեխնոլոգիական, արտադրական կազմակերպություններ և այլն:
Պետական եկամուտների կոմիտեի ծրագրերի նկատմամբ արդեն իսկ առկա հետաքրքրությունը ապահովեց արդյունավետ հաղորդակցումն ու ծրագրերի հասցեական իրազեկումը: Մասնակիցների հետաքրքրությունը մեծ էր հատկապես գալիք տարի հարկային համակարգում մեկնարկող բարեփոխումների նկատմամբ:
Կենտրոնի տնօրեն Արուսյակ Միրզախանյանը, ՊԵԿ Համալիր հարկային ստուգումների վարչության պետի տեղակալ Նաիրուհի Ավետիսյանը, ուսումնական ծրագրերի համակարգողներ Արուս Հակոբյանը և Լիլիթ Պողոսյանը ուսանողներին և շրջանավարտներին ծանոթացրեցին Կենտրոնի գործունեությանը, ներկայացրեցին աշխատանքային հեռանկարները և պրակտիկա անցնելու պայմանները Պետական եկամուտների կոմիտեում:
Աշխատանքային տոնավաճառին մասնակցում էր նաև Հայաստանում Ֆրանսիայի արտակարգ և լիազոր դեսպան Օլիվիե Դըկոտինյին, ով կարևորելով ուսանողների և պետական հատվածի համագործակցությունը՝ ընդգծեց շարունակականության զարգացումն ու նոր ծրագրերի նախաձեռնումը:
